Исроил Ғазода янги хавфсизлик деворини қурмоқда
Мутахассислар бу вақтинчалик "сариқ чизиқ" амалда доимий чегарага айланиши мумкинлигидан хавотир билдирмоқда.
Сунъий йўлдош тасвирлари Исроил ҳарбийлари Ғазо секторида узунлиги ўнлаб километрга чўзилган тупроқ тўсиғини барпо этаётганини кўрсатмоқда. Тўсиқ Ғазо ҳудудининг Исроил назоратидаги қисми билан Фаластин аҳолиси яшаётган ҳудудларни ажратиб туради. Ҳозирда Исроил Ғазо секторининг ярмидан кўпроғини назорат қилмоқда. Бу ҳақда АPnews хабар берди.
Маълумотларга кўра, қурилиш ишлари февраль ойида бошланган ва сўнгги ҳафталарда тезлашган. Тўсиқ Рафаҳ ва Хон Юнис атрофидаги ҳудудларни ҳам қамраб олган. Исроил армияси иншоот хавфсизлик мақсадида, инфилтрациянинг олдини олиш ва кузатув тизимларини жойлаштириш учун барпо этилаётганини билдирган.
Фаластинликлар ва айрим таҳлилчилар эса ушбу тўсиқ сулҳ доирасида белгиланган вақтинчалик "сариқ чизиқ"ни амалда доимий чегарага айлантириши мумкинлигидан хавотирда. Ғазонинг Исроил назоратидаги ҳудудларида кўплаб аҳоли пунктлари ва инфратузилма вайрон қилинган, миллионлаб фаластинликлар эса вақтинчалик лагерларда яшашга мажбур бўлмоқда.
Сулҳ келишуви Исроил қўшинларининг кейинчалик Ғазодан олиб чиқилиши ва халқаро кучлар жойлаштирилишини назарда тутган. Бироқ музокаралар суст кечаётгани ва зўравонликлар давом этаётгани сабаб келишувнинг кейинги босқичлари амалга ошмаяпти. Шу боис тўсиқ қурилиши Ғазо келажаги борасидаги хавотирларни янада кучайтирган.
