Қорақалпоғистонда кредитга олинган BYD аукционда сотилди
Қарздор фуқаро банкдан кредит олиб, уни тўламаган. Шундан сўнг автомашина хатланиб, аукционга чиқарилган.
Фуқаролик ишлари бўйича Беруний туманлараро судининг қарорига асосан қарздор К.Ш.дан “Трастбанк” АБ фойдасига 164,8 млн. сўм ундириш, ундирувни “BYD E2 EV” русумли электромобилига қаратиш белгиланган.
Ушбу суд қарори бўйича чиқарилган ижро ҳужжати Мажбурий ижро бюроси Қорақалпоғистон Республикаси Алоҳида муҳим ижро ишларини ижро этиш бўлими иш юритувига келиб тушиб, бўлим томонидан ижро ҳаракатларига киришилган.
Хусусан, бўлим давлат ижрочиси томонидан қарздорга ушбу ижро ҳужжати ижросини таъминлаш учун 15 кунлик ихтиёрий муддат берилиб, суд қарорининг ижросини таъминламаслик оқибатлари тушунтирилган.
Шунга қарамасдан, қарздор томонидан ижро ҳужжати талаби ихтиёрий равишда бажарилмаганлиги сабабли, кредитга олинган автомашина бўлим давлат ижрочиси томонидан тегишли тартибда хатловга олиниб, онлайн-аукцион савдо майдончаси орқали сотувга чиқариб юборилган.
Ўтказилган аукцион савдосида электрокар 163,2 млн сўмга сотилиб, сотувдан тушган маблағлари “Трастбанк” АБ ҳисоб рақамига йўналтирилган.
