Президент банклар фаолиятини кескин танқид қилди: Уч ойда натижа бўлмаса, раҳбар лавозимини тарк этади
Вазирлик ва идораларга бюрократия, жарима ҳамда ортиқча йиғимларни қисқартириш бўйича бир ҳафталик муддат берилди.
Президент Шавкат Мирзиёев раислигида ўтказилган видеоселектор йиғилишида маҳаллалардаги банклар фаолияти, тадбиркорликни қўллаб-қувватлаш ҳамда бюрократик тўсиқларни бартараф этиш масалалари танқидий муҳокама қилинди.
Давлат раҳбари банкларнинг маҳаллалардаги фаолиятидан мутлақо норози эканини билдириб, Марказий банкнинг ҳудудий раҳбарлари ҳамда давлат банклари филиаллари бошлиқлари ишига қатъий эътироз билдирди.
Қайд этилишича, жорий йил вилоят ва туман банклари ҳамда маҳалла уюшмалари учун синов ва амалий аттестация йили бўлади. Келгуси уч ой давомида натижа кўрсатган раҳбарлар ўз фаолиятини давом эттиради, ўзгариш қилмаганлар эса лавозимидан озод этилади.
Шунингдек, Бош прокуратура ва Ҳисоб палатасига ҳар бир маҳаллада амалга оширилаётган ишлар ҳамда уларнинг амалий натижаларини доимий назорат қилиб бориш вазифаси юклатилди. Йиғилишда маҳаллаларда озодалик, яшаш маданияти ва ҳовли уйлари билан ишлаш масалалари ҳам кўриб чиқилиб, ҳовли уйларни бошқарув компаниялари фаолияти билан қамраб олиш муҳимлиги таъкидланди.
Давлат раҳбари одамларнинг тадбиркорлик билан шуғулланиши ва экспорт фаолиятини йўлга қўйиши учун барча зарур шароитлар яратилаётганини қайд этди. Шу билан бирга, бугунги кунда 51 та вазирлик ва идора 322 та йўналиш бўйича молиявий жарима қўллаш ваколатига эга экани, 2024–2026 йиллар давомида қарийб 3 триллион сўмлик жарима қўллангани маълум қилинди.
Президент назорат органлари фаолиятида ёндашувни тубдан ўзгартириш зарурлигини таъкидлаб, масъуллар тадбиркорни жазолашдан аввал унга имконият яратиши ва тўғри йўл кўрсатишни ўрганиши кераклигини қайд этди.
Йиғилишда экспорт қилувчилар зиммасидаги ортиқча харажатлар ҳам танқид қилинди. Жумладан, бир фура гилосни экспорт қилишда божхона йиғими, фумигация, сертификат ва декларант хизматлари учун 5 миллион сўмгача қўшимча харажат юзага келаётгани мисол сифатида келтирилди.
Шу муносабат билан барча вазирлар ва тармоқ раҳбарларига бир ҳафта муддатда ўз тизимларидаги бюрократик тартиб-таомиллар, жарималар, тўлов ва йиғимларни кескин қисқартириш ҳамда бизнес муҳитини яхшилашга қаратилган таклифларни Президент Администрациясига киритиш топширилди.
