Режаларни бажармаган раҳбарлар хотиржам ишлашга ҳақли эмас — Шавкат Мирзиёев
Ҳудуд ва тармоқ раҳбарларининг олти ойлик фаолияти танқидий таҳлил қилинди.
Президент Шавкат Мирзиёев раислигида жорий йилнинг биринчи ярмида эришилган натижалар ҳамда йил якунига қадар амалга оширилиши лозим бўлган устувор вазифаларга бағишланган видеоселектор йиғилишида ҳудуд ва тармоқ раҳбарларининг олти ойлик режалари ижроси танқидий таҳлил қилиниб, айрим вилоят ва туманларда ялпи ҳудудий маҳсулот, қурилиш ҳамда инвестиция кўрсаткичлари бўйича мавжуд имкониятлардан тўлиқ фойдаланилмагани қайд этилди.
Давлат раҳбари бугунги мураккаб глобал иқтисодий шароитда ҳудудларда тадбиркорликни ривожлантириш ва ижтимоий инфратузилма лойиҳаларини амалга ошириш учун қўшимча маблағлар ажратилаётганини таъкидлади.
Шу билан бирга, вазирлар, ҳокимлар ва тармоқ раҳбарларининг фаолияти аввало аҳолининг турмуш даражаси ва тадбиркорлар учун яратилаётган қулайликларда ўз аксини топиши лозимлиги қайд этилди. Агар амалга оширилаётган ишлар одамлар ҳаётида сезилмаса, бундай натижалар фақат статистик кўрсаткич бўлиб қолиши таъкидланди.
Йиғилишда ойлик, чораклик ва йиллик режаларни бажармаган бирорта вазир, ҳоким ёки тармоқ раҳбари бундай шароитда хотиржам ишлашга ҳақли эмаслиги қатъий кўрсатиб ўтилди.
