Воситачилар АҚШ ва Эронга 10 кунлик сулҳ таклиф қилди
Ҳозирча томонлар ташаббусни қабул қилмаган.
АҚШ ва Эрон ўртасидаги кескинлик фонида минтақавий воситачилар томонларга 10 кунлик сулҳ жорий этиш бўйича таклиф тақдим этди. Бу ҳақда Axios нашри ўз манбаларига таяниб хабар берди.
Нашр маълумотларига кўра, Қатар, Миср, Покистон ва бошқа минтақавий воситачилар Вашингтон ҳамда Теҳронга 10 кун давомида ҳарбий ҳаракатларни тўхтатишни назарда тутувчи ташаббус билан чиққан.
АҚШ расмийлари билдиришича, Президент Дональд Трамп маъмурияти мазкур таклифни ўрганмоқда. Шу билан бирга, Вашингтон Исроилни дипломатик саъй-ҳаракатларга зарар етказиши мумкин бўлган ҳаракатлардан тийилишга чақирган.
Axios қайд этишича, сулҳ амалга оширилса, ҳарбий ҳаракатлар вақтинча тўхтатилади, Ҳурмуз бўғози орқали юк ташиш йўллари тўлиқ очилади ҳамда АҚШ ва Эрон ўртасида ўзаро англашув бўйича музокараларни қайта тиклаш имконияти юзага келади.
Ҳозирча томонларнинг ҳеч бири ушбу таклифни расман қабул қилмаган.
Нашрнинг ёзишича, вазият икки хил сценарий асосида ривожланиши мумкин: биринчиси — томонлар 10 кунлик сулҳга эришади, иккинчиси эса музокаралар муваффақиятсиз якунланса, АҚШ ва Исроил томонидан Эронга нисбатан кенг кўламли ҳарбий амалиёт бошланиши эҳтимоли сақланиб қолади.
Шунингдек, Axios маълумотига кўра, АҚШ сўнгги кунларда минтақага ўнлаб қирувчи ва ёнилғи қуювчи ҳарбий самолётларни жойлаштирган. Исроил манбалари эса мамлакат армияси эҳтимолий кескинлашув фонида юқори жанговар шай ҳолатга келтирилганини билдирган.
