Ўзбекистонда 1,5 мингга яқин фуқаро ўзи бехабар ишга жойлаштирилган
Мурожаатлар асосида 143 та корхона раҳбарига нисбатан маъмурий ва жиноий чоралар кўрилди.
2026 йилнинг биринчи ярмида фуқаролардан ўзининг хабарисиз ишга жойлаштирилгани юзасидан Давлат меҳнат инспекциясига 1 495 та мурожаат келиб тушган. Бу ҳақда инспекция матбуот хизмати хабар берди.
Мурожаатлар ўрганилиши натижасида амалда фаолият юритаётган 143 та корхона ва ташкилот раҳбарига нисбатан маъмурий ҳамда жиноий таъсир чоралари қўлланилган. Шунингдек, 56 та корхона ва ташкилотга ёзма кўрсатмалар киритилган.
Текширувлар давомида айрим мурожаатларда тилга олинган корхона ва ташкилотлар фаолияти аллақачон тугатилгани ҳам аниқланган.
Фуқароларнинг меҳнат ҳуқуқларини тиклаш мақсадида 2020–2025 йиллар давомида Ягона миллий меҳнат тизими (ЯММТ) базасига ноқонуний ёки хато киритилган маълумотлар ўчирилиб, аниқланган камчиликлар бартараф этилган.
