Ўзбекистонда исломий банк очиш учун янги талаблар белгиланди

 

Адлия вазирлиги Банк фаолиятига рухсат бериш тартиби ва шартлари тўғрисидаги низомга киритилган ўзгартириш ва қўшимчаларни давлат рўйхатидан ўтказди.

 

Янги тартибга мувофиқ, "Банклар ва банк фаолияти тўғрисида"ги Қонун асосида исломий банк фаолияти лицензия асосида амалга оширилади. Шунингдек, тадбиркорлик субъектлари томонидан исломий банк ташкил этиш ҳамда амалдаги банкларда "исломий дарчалар" очиш учун ҳуқуқий асослар яратилди.

 

Белгиланган талабларга кўра, исломий банк ёки "исломий дарча" ташкил этишда қуйидагилар мажбурий ҳисобланади:

• Исломий молия кенгаши аъзоларининг Марказий банк билан келишилган бўлиши;

• Марказий банк малака талабларига жавоб берадиган, исломий банк фаолиятига масъул раҳбар ходимнинг мавжудлиги;

• Исломий молия стандартларига мувофиқлик сиёсатининг ишлаб чиқилган бўлиши.

 

Шунингдек, исломий молия кенгаши камида уч нафар аъзодан иборат бўлиши белгиланди. Уларнинг бир қисми исломшунослик, қолганлари эса молия-иқтисод, юридик ёки исломшунослик йўналишида олий маълумотга эга бўлиши лозим.

 

Ислом ҳуқуқи бўйича мутахассис аъзолар камида 5 йиллик, техник эксперт аъзолар эса банк, молия ёки ҳуқуқ соҳасида камида 7 йиллик иш тажрибасига эга бўлиши талаб этилади.

 

Бундан ташқари, камида битта кенгаш аъзоси (2027 йил 1 июлдан бошлаб барча аъзолар) AAOIFI томонидан берилган сертификатлардан бирига эга бўлиши шарт. Ислом ҳуқуқи бўйича мутахассис аъзолар эса араб тилини билиши ҳамда ислом ҳуқуқига оид бирламчи манбаларни тушуниб, шарҳлай олиши лозим.

 

Исломий банк фаолиятига масъул раҳбар ходим ҳам банк ёки молия тизимида камида 7 йиллик тажрибага, молия-иқтисод ёки исломий молия йўналишида олий маълумотга ҳамда AAOIFI сертификатига эга бўлиши керак.

 

Шу билан бирга, Марказий банк билан келишилган банк раҳбар ходимлари лавозимига киришганидан сўнг бу ҳақда 5 иш куни ичида ёзма равишда хабардор қилиш талаби бекор қилинди.