"Чорвоқ меники" деб пляжларни бўлиша олмаган жиноий гуруҳ ушланди
Тезкор тадбирлар давомида жами 13 нафар гумонланувчи қўлга олиниб, уларга нисбатан жиноят ишлари қўзғатилди.
Давлат хавфсизлик хизмати ва Ички ишлар органлари ҳамкорлигида ўтказилган тезкор тадбирлар давомида аниқланишича, жиноий гуруҳлар Чорвоқдаги пляжларни ноқонуний назорат қилиш ва таъсир доирасини кенгайтириш масаласида ўзаро можарога киришган. Можаро давомида биринчи гуруҳ аъзолари иккинчи гуруҳ вакилларини дўппослаб, уларга тан жароҳати етказган.
Мазкур ҳолат юзасидан биринчи гуруҳнинг тўрт нафар аъзоси қўлга олиниб, уларга нисбатан Жиноят кодексининг 277-моддаси билан жиноят иши қўзғатилиб, қамоқ эҳтиёт чораси қўлланилган.
Шундан сўнг, 16 июль куни иккинчи гуруҳ аъзолари қасос олиш мақсадида биринчи гуруҳнинг қўлга олинмаган вакилига кастет ва бейсбол битаси билан ҳужум қилиб, унга оғир тан жароҳати етказган. Тезкор тадбирлар натижасида 19 июль куни ушбу гуруҳнинг уч нафар фаол аъзоси ва воқеага алоқадор яна олти нафар шахс, жами тўққиз киши ушланган.
Тергов давомида иккинчи жиноий гуруҳ вакилларидан бирининг Instagram ижтимоий тармоғи орқали диний экстремистик ғояларни тарғиб қилувчи материалларни тарқатгани ҳам аниқланган. Мазкур ҳолат юзасидан ҳам белгиланган тартибда ҳуқуқий чоралар кўрилмоқда. Тергов ҳаракатлари давом этмоқда.
