Мадуро ва унинг рафиқаси устидан суд 2027 йилда бошланиши мумкин
Николас Мадуро ва унинг рафиқаси АҚШда гиёҳванд моддалар савдосига алоқадорликда айбланмоқда.
Венесуэла президенти Николас Мадуро ва унинг рафиқаси Силия Флоресга нисбатан АҚШда кўрилаётган жиноят иши бўйича суд жараёни 2027 йил июнь ойида бошланиши мумкин.
Бу ҳақда Нью-Ёркнинг Жанубий округи федерал суди электрон маълумотлар базасига жойлаштирилган ҳужжатда маълум қилинди.
Ҳужжатга кўра, ҳимоя ва прокуратура томонлари суд жараёнини 2027 йил июнь ойида бошлаш бўйича ягона жадвални судга тақдим этган.
Таклиф этилган режа асосида прокуратура иш бўйича асосий махфий материалларни 2026 йил 15 ноябргача ҳимоя томонига тақдим этади. Шундан сўнг томонлар 2027 йил 11 мартгача зарур илтимосномаларни киритиш имкониятига эга бўлади.
Мазкур жадвални тасдиқлаш масаласи 22 июль куни Нью-Ёркнинг Жанубий округи федерал судида кўриб чиқилиши кутилмоқда.
Эслатиб ўтамиз, 2026 йил январ ойида АҚШ томонидан Венесуэла президенти Николас Мадуро ва унинг рафиқаси Силия Флорес қўлга олиниб, Нью-Ёркка олиб келинган эди. Уларга нисбатан гиёҳванд моддалар савдосига алоқадорлик айблови қўйилган. Иккаласи ҳам ўзига қўйилган айбловларни рад этган.
