Озарбайжонда ўзбек шоири Шуҳрат Орифнинг китоби тақдимот қилинди

 

Озарбайжоннинг Ағдам шаҳрида таниқли ўзбек шоири Шуҳрат Орифнинг озарбайжон тилида нашр этилган “Мактубдир умрим” китоби тақдимоти бўлиб ўтди.

 

                           

 

Тақдимот маросими Халқаро туркий маданият ташкилоти (ТУРКСОЙ) ташаббуси билан ўтказилган Туркий дунё ёш шоирларининг II фестивали доирасида Ағдамдаги Муғом марказида ташкил этилди.

 

Унда ТУРКСОЙ бош котиби Султон Раев, Дунё ёш турк ёзувчилари бирлиги раиси Интиқом Яшар, Озарбайжон Ёзувчилар уюшмаси раиси ўринбосари Салим Бабуллаўғли, Анқара Ижтимоий фанлар университети ректори Мусо Козим Арижан, Туркия Ёзувчилар уюшмаси раиси Муҳаммед Энес Кала, Туркманистон Маданият вазирлиги вакили Акмурод Ражабов ҳамда туркий давлатлардан ташриф буюрган адабиёт ва маданият намояндалари иштирок этди.

 

       

 

Тадбирда сўзга чиққанлар Ўзбекистон ва Озарбайжон ўртасидаги адабий-маданий алоқалар изчил ривожланиб бораётганини таъкидлаб, “Мактубдир умрим” китоби нашрини икки қардош халқнинг муштарак маънавий қадриятларини тарғиб этиш йўлидаги муҳим қадам сифатида баҳоладилар.

 

         

 

Қайд этилишича, китоб Озарбайжондаги Дунё ёш турк ёзувчилари бирлиги ҳамда “Ҳудудий ҳуқуқий ва иқтисодий маърифат” жамоат бирлашмаси ҳамкорлигида тайёрланган. Лойиҳа туркий халқларнинг умумий маънавий меросини тарғиб қилиш, адабий таржималарни ривожлантириш ва маданий ҳамкорликни кенгайтиришга қаратилган.

 

       

 

Тақдимот давомида Шуҳрат Ориф ижоди ҳақида маърузалар қилиниб, китобдан шеърлар ўқилди. Иштирокчилар ушбу нашр Озарбайжон ва Ўзбекистон ўртасидаги адабий ҳамкорликни янада мустаҳкамлашига ишонч билдирдилар.