Президент Тошкент–Самарқанд пуллик автомагистрали қурилишига тамал тоши қўйди

 

22 июль куни давлат раҳбари Тошкент вилоятининг Ўрта Чирчиқ туманига ташриф буюриб, мамлакат тарихидаги илк замонавий пуллик автомагистраль лойиҳасининг қурилишига расман старт берди.

 

Президент ушбу лойиҳа Янги Ўзбекистоннинг иқтисодий қудрати ва транспорт-логистика салоҳиятини оширишда муҳим аҳамият касб этишини таъкидлади.

 

Қарийб 2,2 миллиард долларлик лойиҳа доирасида 282 километр узунликдаги олти полосали автомагистраль қурилади. Йўл Тошкент, Сирдарё, Жиззах ва Самарқанд вилоятларидаги 13 та туман ҳудудидан ўтади.

 

Лойиҳа таркибида 92 та кўприк, 28 та йўл ўтказгич, 60 та туннель типидаги ўтиш жойи, шунингдек, қишлоқ хўжалиги эҳтиёжлари учун ер ости йўлаклари ва сув ўтказиш иншоотлари барпо этилади.

 

Монолит бетон қопламали автомагистралда текис ҳудудларда транспорт воситалари соатига 150 километргача тезликда ҳаракатланиши мумкин бўлади.

 

Давлат раҳбари таъкидлаганидек, янги йўл ишга тушгач, Тошкентдан Самарқандгача бўлган сафар вақти 5 соатдан 2,5 соатгача қисқаради. Магистраль суткасига 60–80 минг транспорт воситасини қабул қилиш қувватига эга бўлади.

 

Ҳисоб-китобларга кўра, лойиҳа юк ташиш таннархини 19–24 фоизга камайтиради, логистика самарадорлигини оширади ва йўл бўйида логистика марказлари, саноат корхоналари, сервис ҳамда туризм объектлари барпо этилиши ҳисобига янги иш ўринлари яратилади.

 

Лойиҳа халқаро сифат, хавфсизлик ва экологик стандартлар асосида амалга оширилади. Биринчи босқич хитойлик ҳамкорлар билан ЭПС модели асосида қурилади, автомагистрални 2030 йилда фойдаланишга топшириш режалаштирилган.