Венесуэлада ҳантавирусдан уч киши вафот этди
Ўлимлар юзасидан эпидемиологик текширув бошланди.
Венесуэла Соғлиқни сақлаш вазирлиги Ансоатеги штатида ҳантавирус инфекцияси оқибатида уч киши вафот этганини расман тасдиқлади.
Маҳаллий ОАВ маълумотларига кўра, вазирлик марҳумларнинг шахси ва ёши ошкор қилинмаслигини билдирган ҳамда ҳолат юзасидан эпидемиологик ва лаборатор текширувлар бошланганини маълум қилган.
Шунингдек, Соғлиқни сақлаш вазирлиги мамлакатнинг ғарбидаги Баринас штатида икки нафар тиббиёт ходими номаълум сабаблар билан вафот этгани ҳақида ҳам ахборот берган.
Расмий баёнотда Баринасдаги ўлим ҳолатлари билан Ансоатеги штатида қайд этилган ҳантавирус инфекцияси ўртасида ҳеч қандай боғлиқлик аниқланмагани, мазкур ҳолатлар алоҳида тартибда ўрганилаётгани таъкидланган.
Ҳозирда мутахассислар Ансоатеги штатидаги касаллик манбаси ва юқиш шароитларини аниқлаш бўйича тергов-суриштирув ишларини давом эттирмоқда.
