«Ўзбекнефтгаз» собиқ раҳбари Баҳодир Сиддиқовнинг иши судга оширилди
Судланувчиларга талон-торож, мансаб ваколатини суиистеъмол қилиш ва бошқа қатор моддалар бўйича айблов қўйилган.
«Ўзбекнефтгаз» АЖ собиқ бошқарув раиси Баҳодир Сиддиқов ва яна саккиз нафар шахсга нисбатан қўзғатилган жиноят иши судга оширилди.
Олий суд матбуот хизматининг маълум қилишича, мазкур жиноят иши Жиноят ишлари бўйича Яшнобод туман суди иш юритувига келиб тушган.
Иш доирасида жами 9 нафар судланувчига Жиноят кодексининг ўзлаштириш ёки растрата йўли билан талон-торож қилиш, мансаб ваколатини суиистеъмол қилиш, мансаб сохтакорлиги ҳамда жиноий фаолиятдан олинган даромадларни легаллаштириш билан боғлиқ моддалари бўйича айбловлар қўйилган.
Судланувчиларнинг 5 нафарига қамоқ, 4 нафарига эса гаров эҳтиёт чораси қўлланган.
Маълумот учун, Баҳодир Сиддиқов 2023 йил мартдан 2025 йил декабригача «Ўзбекнефтгаз» АЖга раҳбарлик қилган. У лавозимидан бошқа ишга ўтиши муносабати билан озод этилгани маълум қилинган эди.
Шунингдек, 2026 йил 27 январь куни ўтказилган видеоселектор йиғилишида Президент Шавкат Мирзиёев «Ўзбекнефтгаз» ва Давлат активларини бошқариш агентлигида ўтказилган тафтишлар давомида миллиардлаб сўмлик талон-торож ҳолатлари аниқланганини билдирган эди.
