Афғонистондаги сув тошқинларида 40 дан ортиқ киши ҳалок бўлди
Кучли ёмғир ва сув тошқинлари оқибатида ўнлаб одамлар жароҳатланган, яна кўплаб фуқаролар бедарак йўқолган.
Афғонистон шарқида кучли ёмғирлар келтириб чиқарган сув тошқинлари оқибатида 40 дан ортиқ киши ҳалок бўлди. Бу ҳақда Бирлашган Миллатлар Ташкилоти (БМТ) маълум қилди.
Дастлабки маълумотларга кўра, табиий офат оқибатида ўнлаб фуқаролар жароҳат олган, яна кўплаб одамлар бедарак йўқолган. Қидирув-қутқарув ишлари давом этмоқда.
БМТ маълумотига кўра, сув тошқинлари турар жойлар, жамоат бинолари ва тижорат объектларига жиддий зарар етказган. Ҳозирда етказилган зарар кўлами аниқланмоқда.
БМТнинг гуманитар агентликлари ва ҳамкор ташкилотлари жабрланганларнинг эҳтиёжларини баҳоламоқда. Вақтинчалик бошпана, озиқ-овқат, тиббий хизмат, зарур буюмлар ҳамда психологик ёрдам кўрсатиш устувор йўналиш сифатида белгиланган.
Шунингдек, офат ҳудудларига кўчма тиббий бригадалар юборилган, тиббиёт муассасалари кучайтирилган иш режимига ўтказилган. Бироқ шикастланган йўллар ва тоғли ҳудудлар қутқарув ҳамда гуманитар операцияларни мураккаблаштирмоқда.
