Эпштейнга қизлар топишда гумонланган шахс Францияда ўлик ҳолда топилди

 

АҚШлик молиячи ва судланган жинсий жиноятчи Жеффри Эпштейн учун ёш аёлларни танлаб беришда гумон қилинган модель скаути ва фотограф Даниел Сиад Францияда ўлик ҳолда топилди.

 

Le Parisien нашрининг ҳуқуқни муҳофаза қилувчи органлардаги манбаларига таяниб хабар беришича, 69 ёшли Даниел Сиад Париж яқинидаги Коломб шаҳрида вақтинча яшаб турган уйида вафот этган. Нашр маълумотига кўра, у уй эгаси сафарда бўлган пайтда мазкур хонадонда яшаб турган ва қўшниси уни ошхонада жонсиз ҳолатда топган.

 

Гувоҳларнинг сўзларига кўра, Сиад сўнгги вақтларда ишсиз ва моддий қийинчиликда яшаган.

 

BFM TV хабарига кўра, Даниел Сиаднинг жасади 20 июль куни топилган. Ўлимнинг аниқ сабаби ҳозирча расман эълон қилинмаган. Le Parisien эса дастлабки маълумотларга асосланиб, унинг юрак хуружидан вафот этган бўлиши мумкинлигини ёзган. Франция прокуратураси ўлим ҳолатини тасдиқлаб, тергов ҳаракатлари бошланганини маълум қилган.

 

Маълумотларга кўра, Даниел Сиаднинг исми оммага эълон қилинган "Epstein files" ҳужжатларида минг мартадан ортиқ тилга олинган. У модель скаути сифатида Шарқий Европа ва бошқа давлатлардан ёш моделларни излаб топган ҳамда улар ҳақидаги маълумотларни Жеффри Эпштейнга юбориб турган.

 

Нашр ёзишича, Сиад ва Эпштейн ўн йил давомида мунтазам ёзишмалар олиб борган. Хатларда Словакия, Чехия, Полша, Венгрия ва бошқа мамлакатларда топилган қизлар, уларнинг ёши, ташқи кўриниши ва фотосуратлари муҳокама қилинган. Айрим ёзишмаларда 15–17 ёшли қизлар ҳақида ҳам сўз борган.

 

Масалан, 2009 йилда Даниел Сиад Эпштейнга Словакияда эканини ва у ерда 45 нафар қиз билан учрашув режалаштирилганини ёзган. Эпштейн эса бунга жавобан: «Қанча?» деган қисқа хабар юборган. Бошқа ёзишмаларда эса у: "Янги қизлар борми?", "Парижга келишга арзийдиганлар борми?", "Қизиқарли қизлар топилдими?" каби саволлар билан мурожаат қилган.

 

France 24 маълумотига кўра, Даниел Сиад Францияда аёллар савдоси ва жинсий эксплуатацияга алоқадорлик юзасидан ҳам тергов остида бўлган.

 

Сиад эса барча гумонларни рад этиб, фаолияти фақат моделлик бизнеси билан боғлиқ бўлганини таъкидлаган. Унинг айтишича, у моделларни Эпштейн билан фақат қонуний кастинглар учун таништирган, учрашувлар қисқа давом этган ва у ҳеч қачон вояга етмаган қизларни Эпштейн билан таништирмаган. Бироқ тергов материалларида эълон қилинган электрон ёзишмаларда унинг 15–17 ёшли қизлар ҳақида Эпштейн билан мулоқот қилгани қайд этилган.