Эрон ҳали АҚШ билан келишувга тайёр эмас — Трамп
АҚШ президенти Эрон ҳар сафар музокаралар вақтида шартларни ўзгартиришга уринаётганини билдириб, бу жараён тез орада якунланишига ишонч билдирди.
АҚШ президенти Доналд Трамп Эрон ҳозирча Вашингтон билан келишув тузишга тайёр эмаслигини, бироқ яқин орада бунга тайёр бўлишига ишонишини билдирди.
Жоржия штатидаги Мариетта шаҳрида тарафдорлари билан учрашувда сўзга чиққан Трампнинг таъкидлашича, Теҳрон келишувга эришишни истайди, бироқ ҳозирча бунга тайёр эмас.
“Улар ҳали келишувга тайёр эмас. Лекин жуда тез орада тайёр бўлишади,” — деган АҚШ президенти.
Трампнинг сўзларига кўра, Эрон музокаралар давомида ҳар сафар келишув шартларини ўзгартиришга уринмоқда. Шу билан бирга, у Теҳрондан инқирозни ҳал қилишга тайёрлиги ҳақида сигналлар олинаётганини, бироқ бу АҚШ истаётган шартлар асосида эмаслигини қайд этган.
АҚШ президенти, шунингдек, Эрон билан боғлиқ вазият юзасидан:
“Биз уларга жуда қаттиқ зарба бердик,” — дея таъкидлаган.
Шу билан бирга, Трамп Эрон билан юзага келган вазиятни жиддий можаро сифатида баҳоламаслигини билдириб, уни “кичик тўқнашув” деб атаган.
