Францияда рекорд даражадаги жазирама оқибатида 5 764 киши вафот этди
Мутахассислар бундай кўрсаткич 2003 йилдан буён кузатилган энг оғир иссиқ тўлқинларидан бири эканини қайд этди.
Францияда июнь ойида кузатилган кучли жазирама оқибатида камида 5 764 нафар ортиқча ўлим ҳолати қайд этилди. Бу ҳақда мамлакатнинг Santé publique France соғлиқни сақлаш агентлиги маълум қилди.
Агентлик маълумотларига кўра, 17 июнь – 2 июль кунлари Францияда 21 674 нафар фуқаро вафот этган. Бу одатда шу даврда кузатиладиган 15 910 та ўлим ҳолатидан 5 764 тага кўп.
Мутахассисларнинг таъкидлашича, бу 2003 йилдан буён қайд этилган энг оғир иссиқ тўлқинларидан бири бўлди. Бироқ ўша йили юз берган тарихий жазирама қарийб 15 минг кишининг ҳаётига зомин бўлганди.
Қайд этилишича, ортиқча ўлим ҳолатларининг қарийб учдан икки қисми 75 ёш ва ундан катта фуқаролар ҳиссасига тўғри келган. Шу билан бирга, илк бор 15 ёшдан катта барча ёш гуруҳларида ҳам ўлим кўрсаткичининг ошгани кузатилган.
Ўлим ҳолатлари касалхоналар, хонадонлар ва қариялар уйларида қайд этилган бўлиб, уларнинг қарийб ярми шифохоналарда содир бўлган.
Santé publique France бундай ҳолатлар иссиқ тўлқинлари бошланишидан аввал профилактик чораларни кучайтириш ва аҳолининг соғлиғини ҳимоя қилиш бўйича тезкор чоралар кўриш зарурлигини яна бир бор кўрсатганини таъкидлаган.
