Миграция агентлигига нисбатан ижро ҳаракатлари тўхтатилгани йўқ — МИБ
МИБ собиқ агентлик ходимларини ишга тиклаш бўйича ижро ишлари тўхтатилгани ҳақидаги хабарларни инкор этди.
Мажбурий ижро бюроси (МИБ) Миграция агентлигига нисбатан ижро ҳаракатлари тўхтатилгани ҳақидаги хабарларни рад этди.
МИБ маълум қилишича, Олмазор туман бўлими иш юритувида тугатилган Ташқи меҳнат миграцияси агентлигидан 126 та ижро ҳужжати бўйича 13,6 миллиард сўм ундириш ҳамда 28 нафар собиқ ходимни ишга тиклаш тўғрисидаги суд қарорлари мавжуд.
Президент фармонига мувофиқ эски агентлик тугатилиб, унинг ҳуқуқий вориси сифатида Вазирлар Маҳкамаси ҳузуридаги Миграция агентлиги ташкил этилган. Шу асосда МИБ қарздорлик ва ишга тиклаш мажбуриятини янги агентлик зиммасига юклаш ҳақида қарор чиқарган.
Бироқ янги Миграция агентлиги ушбу қарордан норози бўлиб судга мурожаат қилган. Натижада Тошкент шаҳар маъмурий суди МИБнинг қарорини бекор қилган, прокуратура протести эса юқори инстанция томонидан рад этилган.
МИБнинг таъкидлашича, айнан амалдаги суд қарорлари янги агентликдан қарздорликни ундириш ва собиқ ходимларни ишга тиклаш бўйича ижро ҳаракатларини амалга оширишга ҳуқуқий тўсиқ бўлиб турибди.
Шу сабабли Бюро 2026 йил 4 июнь куни Фуқаролик ишлари бўйича Шайхонтоҳур туманлараро судига мурожаат қилиб, суд қарорини ижро этиш тартибига аниқлик киритишни сўраган.
МИБга кўра, суднинг тегишли тушунтириши олингач, ижро ҳаракатлари қонунчиликда белгиланган тартибда давом эттирилади.
