Наманганда дўлга қарши 18 та "Alazan-6" ракеталари учирилди
Махсус чоралар қишлоқ хўжалиги экинларини дўлнинг салбий таъсиридан ҳимоя қилиш мақсадида амалга оширилди.
Наманган вилоятининг Янгиқўрғон туманида қишлоқ хўжалиги экинларини дўлнинг салбий таъсиридан ҳимоя қилиш мақсадида 18 та "Alazan-6" дўлга қарши ракета қўлланилди. Бу ҳақда «Ўзгидромет» хабар берди.
Маълум қилинишича, 23 июль куни Қирғизистон ҳудудидан Янгиқўрғон тумани томон конвектив дўл булутлари силжиган. Натижада ҳудудда кучли дўл ёғиши кузатилган.
Шундан сўнг Янгиқўрғон гидрометеорология мажмуаси мутахассислари дўлнинг давом этишининг олдини олиш ҳамда қишлоқ хўжалиги экинларини ҳимоя қилиш мақсадида дўл булутларига фаол таъсир кўрсатиш ишларини амалга оширди.
Жумладан, 18 та "Alazan-6" дўлга қарши ракета учирилди. Уларнинг:
-
6 таси 1-сонли технологик қўмондонлик пунктидан Исковот, Янгиҳаёт ва Хадикент йўналишларида;
-
6 таси 3-сонли пунктдан Боғистон ва Ўртаялонғоч йўналишларида;
-
яна 6 таси 4-сонли пунктдан Боғистон, Ўртаялонғоч ва Хадикент йўналишларида қўлланилган.
Мазкур тадбирлар дўлнинг қишлоқ хўжалиги экинларига етказиши мумкин бўлган зарарни камайтириш мақсадида амалга оширилгани қайд этилди.
