Самарқандда “закладка” орқали гиёҳванд модда тарқатган 44 нафар наркокурер қўлга олинди
21 та геолокацияга яшириб қўйилган, қарийб 1 500 дозага тенг мефедрон синтетик гиёҳвандлик воситаси аниқланди.
Республика бўйлаб ўтказилаётган “Хавфсиз ва соғлом юрт” кенг қамровли тезкор-профилактик тадбирлари доирасида Самарқанд вилояти Ички ишлар бошқармаси Тезкор-қидирув хизмати ҳамда Давлат хавфсизлик хизмати ходимлари ҳамкорлигида йирик наркотармоқ фаолиятига чек қўйилди.
Тезкор-қидирув тадбирлари давомида Самарқанд шаҳри ҳамда Оқдарё, Самарқанд, Пастдарғом ва Нуробод туманларида Телеграм мессенжеридаги «наркодўкон» канали ва махсус бот орқали синтетик гиёҳвандлик воситаларини «закладка» усулида тарқатиш билан шуғулланиб келган 44 нафар шахс қўлга олинди.
Ўтказилган тезкор тадбирлар давомида 21 та геолокацияга яшириб қўйилган, қарийб 1 500 дозага тенг мефедрон синтетик гиёҳвандлик воситаси аниқланиб, мусодара қилинди. Шу тариқа ушбу гиёҳванд моддаларнинг аҳоли орасида тарқалишининг олди олинди.
Мазкур ҳолат юзасидан Жиноят кодексининг 273-моддаси 6-қисми билан жиноят иши қўзғатилиб, тергов ҳаракатлари олиб борилмоқда.
