Сирдарёда 24 ёшли йигит автомашинадан ўзини ташлаб ҳалок бўлди

 

Сирдарё вилоятида 24 ёшли Асадбек Бўрибоевнинг вафоти юзасидан терговга қадар текширув давом этмоқда. Марҳумнинг қариндошлари эса воқеа расмий талқинда айтилганидек бўлмаганини билдириб, ҳолатни чуқур ўрганишни сўрамоқда.

 

Маълум қилинишича, Жиззах вилояти Дўстлик туманида яшовчи 24 ёшли Асадбек Бўрибоев 2026 йил 29 июнь куни Тошкент шаҳридан уйига қайтаётганида ҳалок бўлган.

 

Марҳумнинг яқинлари айтишича, у ўша куни телефон орқали оиласига қўнғироқ қилиб, кеч бўлгани сабабли Сирдарё туманида яшовчи қариндошиникида тунаб қолишини билдирган. Орадан кўп ўтмай, қариндошларга Асадбек йўл-транспорт ҳодисасига учрагани ва аҳволи оғир экани ҳақида хабар берилган.

 

Марҳумнинг амакиси Асқар Шариповнинг сўзларига кўра, шифохонага етиб борилганда Асадбекнинг бўйни цинган бўлган ва у тонгга яқин вафот этган.

 

Қариндошларнинг таъкидлашича, воқеа иштирокчилари Асадбек ҳаракатланаётган Cobalt автомобилидан қайт қилмоқчи бўлиб эшикни очган ва йиқилиб тушганини айтишган. Бироқ улар марҳумнинг танасидаги айрим жароҳатлар ушбу талқинга мос келмаслигини билдирмоқда.

 

Уларнинг айтишича, марҳумнинг юзи деярли шикастланмаган, бироқ қўллари ва бел қисмида кўкаришлар бўлган. Шунингдек, воқеа жойидан эмас, бошқа автомобиль — Дамас орқали шифохонага олиб борилгани, жасаднинг ювилиб, оппоқ чойшабга ўралгани ҳам уларда қўшимча саволлар уйғотган.

 

Марҳумнинг яқинлари воқеа гувоҳларининг кўрсатмалари ҳам бир-бирига мос келмаётганини билдириб, кийим-кечак ва мобил телефонни тергов органларига ўзлари топширганини ҳамда иш ҳар томонлама ва холис ўрганилишини сўраган.

 

Ҳолат юзасидан Бош прокуратура расмий изоҳ берди.

 

Маълум қилинишича, 2026 йил 30 июнь куни Сирдарё тумани ИИБ навбатчилик қисмига мазкур ҳодиса юзасидан хабар келиб тушган.

 

Дастлабки текширувларга кўра, фуқаро У. Н. бошқарувидаги Cobalt автомашинаси Сирдарё туманидаги ички йўлда ҳаракатланаётган вақтда, олд йўловчи ўриндиғида ўтирган Асадбек Бўрибоев бир неча бор автомобилни тўхтатишни сўраган. Ҳайдовчи ҳаракатни давом эттиргач, у ўзини автомашинадан ташлаб юборгани оқибатида оғир тан жароҳати олган.

 

Жабрланувчи Сирдарё тумани тиббиёт бирлашмасига олиб борилган, бироқ кўрсатилган тиббий муолажаларга қарамай вафот этган.

 

Суд-тиббий экспертизанинг дастлабки хулосасига кўра, Асадбек Бўрибоевнинг ўлимига автомашинадан тушиб кетиш оқибатида олган тан жароҳатлари сабаб бўлган.

 

Ҳозирда мазкур ҳолат юзасидан Сирдарё тумани прокуратураси томонидан терговга қадар текширув ҳаракатлари олиб борилмоқда. Текширув якунларига кўра ҳодисага ҳуқуқий баҳо берилиши маълум қилинган.