Ўта хавфли жиноятчи Мисрдан Ўзбекистонга экстрадиция қилинди
Интерпол қидирувидаги шахс товламачилик ва бошқа оғир жиноятларда айбланган.
Узоқ вақт давомида одил судловдан яшириниб юрган ўта хавфли жиноятчи Миср Араб Республикасидан Ўзбекистонга экстрадиция қилинди. Бу ҳақда Интерполнинг Ўзбекистондаги Миллий марказий бюроси маълум қилди.
Қайд этилишича, мазкур шахс товламачилик ва бошқа оғир жиноятларни содир этганликда айбланиб, Ўзбекистон ҳуқуқни муҳофаза қилувчи органлари ташаббуси билан халқаро қидирувга берилган.
Интерполнинг Ўзбекистондаги ва Қоҳира шаҳридаги Миллий марказий бюролари ҳамкорлигида қидирувдаги шахснинг ҳаракатланиш йўналишлари аниқланиб, унинг Миср ҳудудида экани тасдиқланган.
Экстрадиция тўғрисидаги сўров кўриб чиқилгач, Мисрнинг ваколатли идоралари уни Ўзбекистонга топшириш ҳақида қарор қабул қилган.
Барча халқаро-ҳуқуқий тартиб-таомиллар якунлангач, қидирувдаги шахс Интерпол ходимларига топширилиб, Ўзбекистон қонунчилигига мувофиқ жиноий жавобгарликка тортиш учун мамлакатга олиб келинди.
