Тошкентда “закладка” орқали наркотик тарқатган украиналиклар ушланди
Уч нафар хориж фуқароси уйида 2,4 килограммдан ортиқ гиёҳвандлик воситалари мусодара қилинди.
“Хавфсиз ва соғлом юрт” тезкор-профилактик тадбирлари доирасида Давлат хавфсизлик хизмати Тошкент шаҳар бошқармаси ҳамда пойтахт Ички ишлар бош бошқармаси ходимлари ҳамкорлигида ўтказилган тезкор тадбирда гиёҳвандлик воситалари савдоси билан шуғулланган хориж фуқаролари ушланди. Бу ҳақда ДХХ хабар берди.
Аниқланишича, жорий йил 12 июнь куни Ўзбекистонга келган Украинанинг 1994, 1997 ва 2001 йилларда туғилган уч нафар фуқароси Тошкент шаҳрининг Яшнобод туманида вақтинча яшаб турган икки хонадонда истиқомат қилган.
Тезкор тадбир давомида уларнинг яшаш жойлари кўздан кечирилганда, пойтахтнинг турли ҳудудларига «закладка» усулида тарқатиш учун тайёрланган наркотик моддалар борлиги аниқланган.
Мусодара қилинган моддалар «гашиш», «мефедрон» ва «альфа-ПВП» бўлиб, уларнинг умумий оғирлиги 1 килограмм 945 граммни ташкил этган.
Бундан ташқари, интернет орқали фаолият юритувчи наркодўкон ташкилотчилари томонидан ушбу шахсларга кейинчалик қайта қадоқлаб тарқатиш учун хуфия жойда қолдирилган 460 грамм «мефедрон» ва «альфа-ПВП» ҳам ашёвий далил сифатида олинган.
Мазкур ҳолат юзасидан Жиноят кодексининг 273-моддаси 6-қисми «а» банди билан жиноят иши қўзғатилган. Гумонланувчиларга нисбатан қамоқ эҳтиёт чораси қўлланилган бўлиб, тергов ҳаракатлари давом эттирилмоқда.
