Ўзбекистонлик олима Халқаро Математика Иттифоқи қўмитаси аъзолигига сайланди
АҚШда ўтган Халқаро Математика Иттифоқи Бош Ассамблеясида олима Умида Балтаева нуфузли қўмита таркибига сайланди.
АҚШнинг Нью-Йорк шаҳрида Халқаро Математика Иттифоқи (International Mathematical Union – IMU) Бош Ассамблеясининг навбатдаги йиғилиши бўлиб ўтди. Унда дунёнинг етакчи математик олимлари, миллий математика жамиятлари раҳбарлари ҳамда IMU раҳбарияти иштирок этди.
Мазкур нуфузли анжуманда Ўзбекистон делегацияси ҳам фаол қатнашди.
Йиғилиш якунларига кўра, Хоразм Маъмун академияси бош илмий ходими, профессор Умида Балтаева IMU'нинг Ривожланаётган давлатлар қўмитаси (Committee for Developing Countries) аъзолигига сайланди. Ушбу сайлов Ўзбекистон математика илм-фани ва мамлакат математиклари учун муҳим халқаро эътироф сифатида баҳоланмоқда.
Шунингдек, Ўзбекистон Фанлар академияси Математика институти лаборатория мудири, профессор Равшан Ашуров ҳам Бош Ассамблея муҳокамаларида фаол иштирок этди. У хорижлик ҳамкасблари билан илмий ҳамкорликни кенгайтириш, қўшма лойиҳаларни йўлга қўйиш ҳамда институционал алоқаларни мустаҳкамлаш юзасидан қатор учрашувлар ўтказди.
Таъкидланишича, мазкур йиғилиш Ўзбекистон математикларининг халқаро илмий ҳамжамиятдаги фаоллиги ва нуфузини ошириш, янги илмий ҳамкорликларни ривожлантириш ҳамда мамлакат математика мактабининг халқаро майдондаги ўрнини янада мустаҳкамлашда муҳим аҳамият касб этади.
