Ангренда машинадан унаштирилган йигит ва қизнинг жасади топилди
Суд-тиббий экспертизасига кўра, уларнинг ўлимига ис газидан заҳарланиш сабаб бўлган.
Тошкент вилояти Ангрен шаҳрида унаштирилган йигит ва қиз автомобиль ичида ис газидан заҳарланиб вафот этди. Бу ҳақда Миллар хабар берди.
Маълум қилинишича, 16 июль куни соат 23:53 да Ангрен шаҳрида яшовчи фуқаро Тошкент вилояти ИИББ навбатчилик қисмига мурожаат қилиб, 26 ёшли синглиси ва унинг 31 ёшли бўлажак турмуш ўртоғи Гентра автомобилида уйдан чиқиб кетгани ва қайтиб келмаганини маълум қилган.
Олиб борилган тезкор-қидирув тадбирлари давомида йигит ва қизнинг жасади гараж ичида турган Гентра автомобилидан ис газидан заҳарланиш аломатлари билан топилган.
Суд-тиббий экспертизасининг дастлабки хулосасига кўра, уларнинг ўлимига ис газидан заҳарланиш оқибатида юзага келган бош мия ва ўпка шиши ҳамда ўткир юрак-қон томир етишмовчилиги сабаб бўлган.
Маҳалла фаолларининг айтишича, марҳумлар яқин кунларда никоҳ тўйи ўтказишни режалаштирган бўлиб, оилалар ўртасида низолар кузатилмаган.
Ҳозирда мазкур ҳолат юзасидан Ангрен шаҳар прокуратураси томонидан терговга қадар текширув ишлари олиб борилмоқда.
