Исроил сулҳга қарамай Ливан жанубида ҳарбий амалиётларни давом эттирмоқда
Ливан ҳукумати буни сулҳнинг навбатдаги бузилиши деб баҳолаб. Исроилни мамлакат суверенитетига тажовуз қилишда айблаган.
Исроил армияси Ливан жанубидаги бир қатор ҳудудларда биноларни портлатиш ва ҳарбий амалиётларни давом эттирди. Бу ҳаракатлар Исроил ва Ливан ўртасида АҚШ воситачилигида эришилган сулҳ амалда бўлиб турган ҳамда томонлар вазиятни барқарорлаштириш бўйича музокараларни давом эттираётган бир пайтда содир бўлмоқда.
Al Jazeera хабарига кўра, Исроил ҳарбийлари Кфар Кила, Майс ал-Жабал, Хула ва Маркаба каби чегара қишлоқларида бир нечта бино ва иншоотларни портлатган. Ливан расмийлари буни сулҳ келишувининг навбатдаги бузилиши деб баҳолаб, Исроилни мамлакат суверенитетига тажовуз қилишда айблаган.
Сўнгги кунларда АҚШ воситачилигида Исроил қўшинларини Ливан жанубидан босқичма-босқич олиб чиқиш, уларнинг ўрнига Ливан армиясини жойлаштириш ҳамда чегарадаги хавфсизликни мустаҳкамлаш масалалари юзасидан музокаралар олиб борилмоқда. Бироқ Исроил армияси Ҳизбуллоҳ ҳаракатига тегишли деб ҳисоблаган ҳарбий инфратузилмага зарба бериш операциялари давом этишини билдирган.
Ўз навбатида, Ҳизбуллоҳ Исроилни сулҳ шартларини мунтазам равишда бузаётганликда айблаб, халқаро ҳамжамиятни босимни кучайтиришга чақирди. Ливан ҳукумати ҳам Исроилнинг ҳарбий ҳаракатлари минтақадаги вазиятни янада кескинлаштираётганини таъкидламоқда.
