Марко Рубио АҚШга кириш бўйича янги чекловларни эълон қилди
Айрим жиноятларга алоқадор шахслар ҳамда уларнинг яқинларига виза берилмайди.
АҚШ Давлат котиби Марко Рубио кибержиноятлар ва бошқа трансмиллий онлайн жиноятларга алоқадор шахсларга нисбатан янги виза чекловлари жорий этилишини эълон қилди. Бу ҳақда АҚШ Давлат департаменти маълум қилди.
Янги сиёсатга кўра, киберфирибгарлик, кибержиноятлар ҳамда болаларга нисбатан онлайн жинсий зўравонлик каби жиноятларни содир этган ёки уларга алоқадор деб гумон қилинаётган шахслар, шунингдек, айрим ҳолларда уларнинг яқин қариндошлари ҳам АҚШ визасини олиш имкониятидан маҳрум этилиши мумкин.
Марко Рубионинг таъкидлашича, бу турдаги жиноятлар ортида кўпинча трансмиллий жиноий гуруҳлар туради.
"Кўпинча Хитой трансмиллий жиноий ташкилотлари томонидан мувофиқлаштириладиган фирибгарлик схемалари фақат 2024 йилнинг ўзида америкаликларга камида 10 миллиард доллар зарар етказди. Бундан ташқари, америкалик болалар хориждан бошқариладиган жинсий зўравонлик тармоқларининг нишонига айланмоқда," — деган АҚШ Давлат котиби.
Рубионинг сўзларига кўра, янги виза сиёсати коррупция, пул ювиш, одам савдоси ва бошқа трансмиллий жиноятларга қарши курашни кучайтиришга хизмат қилади.
