Остонада илк ҳаво таксиси синовдан ўтказилди
Мамлакат 2028 йилгача вертипортлар тармоғини барпо этиш ва ҳаво таксиларини транспорт тизимига интеграция қилишни режалаштирмоқда.
Қозоғистон пойтахти Остонада электр вертикал учиш ва қўниш (eVTOL) технологиясига асосланган илк ҳаво таксисининг намойиш парвози муваффақиятли ўтказилди.
Намойиш парвози «Келажак ўйинлари – 2026» (GOTF 2026) халқаро турнири доирасида ташкил этилди. Лойиҳа Қозоғистоннинг Alatau Advance Air Group Ltd. (AAAG) компанияси ҳамда Хитойнинг AutoFlight компанияси ҳамкорлигида амалга оширилди.
Синовда AutoFlight Prosperity русумидаги eVTOL ҳаво таксисидан фойдаланилди. Қурилма бир нафар учувчи ва беш нафар йўловчини ташишга мўлжалланган бўлиб, соатига 200 километргача тезликда ҳаракатлана олади ва 200 километргача масофани босиб ўтиш имкониятига эга. 13 та электр двигатели билан жиҳозланган ушбу транспорт воситаси шовқини паст ва атмосферага карбонат ангидрид чиқармайди.
Хавфсизлик талабларига мувофиқ, илк намойиш парвози йўловчиларсиз амалга оширилди. Бу янги авлод авиация технологияларини тижорат фойдаланишидан аввал синовдан ўтказиш бўйича халқаро амалиёт ҳисобланади.
Қозоғистон расмийлари ушбу лойиҳа мамлакатда Urban Air Mobility (UAM) — шаҳар ҳаво транспорти тизимини шакллантириш бўйича кенг кўламли дастурнинг бир қисми эканини таъкидлади. Мазкур йўналишда зарур қонунчилик базаси яратилган бўлиб, вертипортлар, учувчисиз ҳаво ҳаракатини бошқариш тизимлари ва рақамли инфратузилмани ривожлантириш ишлари бошланган.
Шунингдек, 2028 йилгача Қозоғистонда олтита вертипорт қуриш ва ҳаво таксиларини мамлакат транспорт тизимига босқичма-босқич интеграция қилиш режалаштирилган. Мутахассислар фикрича, ушбу технология йўловчи ташиш билан бирга логистика, шошилинч тиббий ёрдам ва бошқа хизматлар ривожига ҳам хизмат қилади.
