Тошкентда Ободонлаштириш бошқармаси бошлиғи жаримага тортилди
Бунга аномал иссиқ шароитида тозалаш хизмати ходимлари ишга жалб этилгани ҳамда уларга зарур меҳнат шароитлари яратилмагани сабаб бўлди.
Тошкент шаҳрининг Яккасарой туманида аномал иссиқ шароитида тозалаш хизмати ходимларини ишга жалб қилиш ҳолати юзасидан Ободонлаштириш бошқармаси бошлиғи маъмурий жавобгарликка тортилди.
Давлат меҳнат инспекцияси маълум қилишича, ижтимоий тармоқларда 18 июль куни Шота Руставели кўчасида юқори ҳаво ҳароратига қарамай ободонлаштириш ходимлари ишлаётгани акс этган видеолар тарқалганидан сўнг ҳолат ўрганилган.
Текширув давомида Яккасарой тумани Ободонлаштириш бошқармасида меҳнатни муҳофаза қилиш талаблари бузилгани, жумладан, ободонлаштириш ишларига жалб этилган ходимлар учун қонунчиликда белгиланган қулай ва хавфсиз меҳнат шароитлари яратилмагани аниқланган.
Аниқланган қонунбузарликлар юзасидан Ободонлаштириш бошқармаси бошлиғига нисбатан Маъмурий жавобгарлик тўғрисидаги кодекснинг 49-моддаси 1-қисми (меҳнат ва меҳнатни муҳофаза қилиш тўғрисидаги қонунчиликни бузиш) асосида маъмурий жавобгарлик чораси қўлланилди.
