Ўзбекистон биометрик паспортлари халқаро хавфсизлиги кучайтирилди
Мазкур янгиланиш биометрик паспортлардаги маълумотлар яхлитлигини таъминлаб, халқаро саёҳатлар хавфсизлигини оширишга хизмат қилади.
Жорий йилнинг 21 июль куни Ички ишлар вазирлиги Миграция ва шахсийлаштириш департаменти Шахсийлаштириш маркази делегацияси Канаданинг Монреал шаҳрида жойлашган Халқаро фуқаро авиацияси ташкилоти (ICAO) бош қароргоҳига ташриф буюрди.
Ташриф давомида Ўзбекистон фуқароларининг биометрик паспортлари хавфсизлигини таъминловчи PKI (Очиқ калит инфратузилмаси) ҳамда ICAO PKD (ICAO Очиқ калит реестри) рақамли сертификатлари ICAO Doc 9303 халқаро стандарти талабларига мувофиқ муваффақиятли янгиланди.
Янгиланган сертификатлар ICAO PKD тизимига аъзо барча давлатларга тарқатилди. Бу эса хорижий давлатлар чегара назорати органлари томонидан Ўзбекистон фуқароларининг биометрик паспортларини текшириш жараёнида юзага келиши мумкин бўлган техник қийинчиликларнинг олдини олади.
Шунингдек, мазкур янгиланиш биометрик паспортлардаги маълумотлар яхлитлигини ишончли ҳимоя қилиш, ҳужжатларнинг ҳақиқийлигини тезкор тасдиқлаш ҳамда халқаро саёҳатлар хавфсизлигини янада оширишга хизмат қилади.
Қайд этилишича, Ўзбекистон ICAO PKD тизимининг фаол иштирокчиси сифатида электрон саёҳат ҳужжатлари инфратузилмасини ривожлантириш ва ушбу йўналишдаги халқаро ҳамкорликни изчил мустаҳкамлашни давом эттирмоқда.
