Ўзбекистонда ҳафта охирида яна жазирама кузатилади
Айрим ҳудудларда ҳаво ҳарорати 42 даражагача кўтарилади.
«Ўзгидромет» маълумотига кўра, дам олиш кунлари Ўзбекистон ҳудудида асосан кам булутли ва ёғингарчиликсиз об-ҳаво кузатилади. Фақат айрим тоғли ҳудудларда қисқа муддатли ёмғир ёғиши ва момақалдироқ бўлиши мумкин.
Синоптиклар прогнозига кўра, ҳаво ҳарорати босқичма-босқич кўтарилиб, якшанба куни 36–39 даражагача, республиканинг шимолий, жанубий ва чўл ҳудудларида эса 40–42 даражагача иссиқ бўлиши кутилмоқда.
Шунингдек, шимолий ва чўл ҳудудларида шамол тезлиги 13–18 м/с гача кучайиши, айрим жойларда чанг-тўзонлар кузатилиши мумкин.
Бундан ташқари, 24 июль куни Тошкент, Андижон, Наманган ва Фарғона вилоятларининг тоғолди ҳамда тоғли ҳудудларида сел-сув тошқинлари юзага келиши эҳтимоли сақланиб қолмоқда.
Тошкент шаҳрида эса дам олиш кунлари кам булутли ва ёғингарчиликсиз об-ҳаво кузатилади. Шанба куни ҳаво ҳарорати 35–37 даража, якшанба куни эса 36–38 даражагача кўтарилиши прогноз қилинмоқда. Шамол шарқдан 3–8 м/с тезликда эсади.
