Ўзбекистондаги музейлардан 500 дан ортиқ экспонат ёқолди
Қўқон давлат музей-қўриқхонаси ва Сирдарё вилояти музейи фондларида экспонатлар етишмаётгани аниқланди.
Республикадаги давлат музейларида ўтказилаётган инвентаризация жараёнида айрим музей фондларида экспонатлар етишмаётгани аниқланди.
Маданий мерос агентлигининг маълум қилишича, инвентаризация комиссияси Қўқон давлат музей-қўриқхонаси ва унинг филиаллари, жумладан, Ғафур Ғулом номидаги Қўқон адабий музейи фондларида 500 га яқин музей буюми, шунингдек, Сирдарё вилояти давлат тарих ва маданият музейи коллекциясида 16 та музей экспонати етишмаётганини аниқлаган.
Аниқланган ҳолатлар юзасидан ҳуқуқий баҳо бериш ва тегишли чораларни кўриш мақсадида материаллар белгиланган тартибда прокуратура органларига юборилган.
Қайд этилишича, инвентаризация Ўзбекистон Президентининг “Музейларда хизмат кўрсатиш соҳасини ривожлантириш чора-тадбирлари тўғрисида”ги ПҚ-261-сон қарори ҳамда Вазирлар Маҳкамаси ва Бош прокуратуранинг қўшма йиғилиши баённомаси ижроси доирасида амалга оширилмоқда.
Мазкур жараён республика музейлари фондларида сақланаётган музей буюмлари ва коллекцияларининг сақланиш ҳолатини босқичма-босқич ўрганишга қаратилган.
