Абитуриентлар учун ОТМ ва таълим йўналишини танлаш бошланди
Танлов 8 августга қадар давом этади.
Давлат олий ва профессионал таълим муассасаларига кириш тест синовларида иштирок этган абитуриентлар учун олий таълим муассасалари ва таълим йўналишларини танлаш жараёни бошланди.
Билим ва малакаларни баҳолаш агентлигининг маълум қилишича, абитуриентлар 2026 йил 25 июлдан 8 августга қадар 15 кун давомида my.uzbmb.uz платформасининг “Олий ва касбий таълим муассасаларига қабул” бўлими орқали ўз танловини амалга ошириши мумкин.
Дастлаб абитуриентлар танлов устуворлиги ва мақсадли қабул бўйича танловни белгилайди. Шундан сўнг тест топширилган фанлар мажмуаси ҳамда таълим тилига мос равишда 5 тагача олий таълим муассасаси ва таълим йўналишини, шунингдек, таълим шаклини танлайди.
Таълим йўналишларини битта ёки турли олий таълим муассасалари доирасида танлаш мумкин. Танлов якунлангач, маълумотлар СМС орқали юборилган тасдиқлаш коди ёрдамида тасдиқланади ва абитуриентнинг қайд варақаси шакллантирилади.
Абитуриентлар танлов муддати якунига қадар ўз маълумотларини ўзгартириши ҳамда қайд варақасини қайта юклаб олиши мумкин.
Талабаликка тавсия этилган ёки этилмагани ҳақидаги якуний натижалар таълим йўналишларини танлаш босқичи тўлиқ якунланганидан сўнг бир ҳафта ичида эълон қилинади.
