Қашқадарёда эркак ўлган итни Damas'га боғлаб судради
Ижтимоий тармоқларда тарқалган ҳолат юзасидан расмий муносабат билдирилди
Қашқадарё вилоятининг Қамаши туманида ўлган итни Damas автомобилига боғлаб судраган фуқарога нисбатан маъмурий ҳужжатлар расмийлаштирилди.
Қашқадарё вилояти ИИБнинг маълум қилишича, 24 июль куни соат тахминан 13:18 да Қамаши тумани “Қуйи янги” маҳалласида яшовчи фуқаро ўзига тегишли Damas русумли автомашина билан ҳаракатланаётиб, йўл четида нобуд бўлган итни кўрган.
Аниқланишича, фуқаро ҳайвонни автомобилнинг орқа қисмига боғлаб судраб кетган. Ҳолатни Қарши–Шаҳрисабз автомобиль йўлида ҳаракатланаётган бошқа ҳайдовчилар кўриб қолган ҳамда автомобилни тўхтатиб, вазиятга ойдинлик киритган.
Мазкур ҳолат юзасидан ҳуқуқбузарга нисбатан Маъмурий жавобгарлик тўғрисидаги кодекснинг 111-моддаси асосида ҳужжатлар расмийлаштирилган ва қонуний баҳо бериш учун ЖИБ Қамаши туман судига юборилган.
Ҳолат юзасидан қўшимча маълумот берилиши билдирилган.
