Бойсундаги техноген аварияни бартараф этишга Хитой мутахассислари жалб қилинади

 

Бойсун туманидаги “Мустақилликнинг 25 йиллиги” конида юзага келган техноген аварияни бартараф этиш ишларига Хитойнинг ССДС бурғилаш компанияси мутахассислари жалб этилади. Бу ҳақда «Ўзбекнефтгаз» АЖ ахборот хизмати маълум қилди.

 

«Ўзбекнефтгаз» АЖ бошқарув раиси Абдуғани Сангинов Хитой миллий нефть корпорацияси (CNPC) таркибидаги ССDС бурғилаш компанияси вакиллари билан ишчи учрашув ўтказди. Унда Бойсун туманидаги “Мустақилликнинг 25 йиллиги” конида юзага келган техноген авария оқибатларини бартараф этиш ишларини жадаллаштириш масалалари муҳокама қилинди.

 

Мулоқот давомида аварияни бартараф этиш бўйича амалий ишларни имкон қадар тез бошлаш учун тайёргарлик жараёнларини қисқа муддатларда якунлаш зарурлиги қайд этилди. Шу мақсадда объектга махсус бурғилаш қурилмалари, юқори босим шароитида ишлашга мўлжалланган технологик ускуналар ва бошқа зарур техник воситаларни етказиш, шунингдек, малакали мутахассисларни жалб этиш бўйича келишувга эришилди.

 

Томонлар қутқарув-бурғилаш ишларини белгиланган муддатларда бошлаш ҳамда техник ечимларни тезкор қабул қилиш учун икки компания мутахассислари ўртасидаги ҳамкорликни янада кучайтиришга келишиб олди.

 

Шунингдек, учрашувда техноген авария тўлиқ бартараф этилгач, нефть-газ соҳасида янги бурғилаш ва геология-қидирув лойиҳаларини биргаликда амалга ошириш истиқболлари ҳам муҳокама қилинди.