Эрон Европа Иттифоқини иккиюзламачиликда айблади
Ташқи ишлар вазирлиги Европа Иттифоқининг Теҳронга қарши янги санкцияларини кескин танқид қилди.
Эрон Ташқи ишлар вазирлиги матбуот котиби Бағайининг айтишича, Европа давлатлари инсон ҳуқуқлари ҳимояси ҳақида тез-тез баёнот беради, бироқ унинг фикрича, Исроил ва АҚШнинг Эронга қарши ҳарбий ҳаракатлари оқибатида ҳалок бўлган тинч аҳоли ва инфратузилмага етказилган зарар юзасидан сукут сақлайверади. Шу сабабли у Европа сиёсатини "икки хил стандарт"га асосланган деб баҳолади. Бу ҳақда Reuters хабар берди.
Бағайининг баёноти Европа Иттифоқи беш нафар эронлик судья ҳамда Ашияне кибергуруҳи асосчиси Нима Солиҳийга нисбатан инсон ҳуқуқлари бузилишига алоқадорлик айблови билан янги санкциялар жорий этганидан сўнг берилди. Брюссел бу шахслар Эронда ички репрессиялар ва ахборотни чеклаш билан боғлиқ фаолиятда иштирок этганини билдирган.
Европа Иттифоқи ташқи сиёсат бўйича вакили Кажа Каллас эса дунё эътибори Яқин Шарқдаги урушга қаратилган бўлса ҳам, Эрондаги инсон ҳуқуқлари билан боғлиқ вазият эътибордан четда қолмаслиги кераклигини таъкидлаган. Унинг сўзларига кўра, ЙИ инсон ҳуқуқларини бузишда айбланаётган шахсларга нисбатан жавобгарлик чораларини қўллаш сиёсатини давом эттиради.
