Эрон Трампнинг музлатилган активлар ҳақидаги баёнотини кескин қоралади
Теҳрон бундай қадам давлатлар суверенитети ҳамда халқаро молия тизимига жиддий путур етказиши мумкинлигини таъкидлади.
Эрон Ташқи ишлар вазири Аббос Ароқчи АҚШ президенти Доналд Трампнинг Эроннинг музлатилган хорижий активларидан фойдаланиш ҳақидаги баёнотини "ўтга ёғ сепиш билан баробар" деб баҳолади. Унинг айтишича, бундай қарор халқаро молия тизими ва давлатлар суверенитетига жиддий путур етказиши мумкин. Бу ҳақда Aljazeera хабар берди.
Аввалроқ Трамп АҚШ назоратидаги Эрон маблағлари минтақадаги можаро оқибатида етказилган зарарларни қоплаш учун ишлатилиши мумкинлигини билдирганди. У бу маблағлар АҚШ ихтиёрида эканини ва зарурат туғилганда улардан фойдаланилишини айтган.
Ароқчининг таъкидлашича, агар бир давлат бошқа мамлакатнинг музлатилган активларини ўз хоҳишига кўра сарфлашни бошласа, бу халқаро ҳуқуқнинг асосий тамойилларини издан чиқаради. Вазир бундай амалиёт келажакда бошқа давлатлар учун ҳам хавфли тажрибага айланишидан огоҳлантирди.
Эрон ва АҚШ ўртасидаги муносабатлар сўнгги ҳафталарда янада кескинлашган. Ҳарбий тўқнашувлар, ўзаро таҳдидлар ва иқтисодий босимлар фонида музлатилган Эрон активлари масаласи ҳам икки давлат ўртасидаги асосий тортишувлардан бирига айланган.
