Гутерриш 2009 йилдан бери илк бор Сурияга боради
Ушбу ташриф Башар Асад ҳокимияти ағдарилганидан кейинги сиёсий ўтиш даврини қўллаб-қувватлашга қаратилган.
БМТ матбуот котиби Стефан Дюжаррикнинг маълум қилишича, Гутерриш Дамашқда Сурия президенти Аҳмад ал-Шараа ва бошқа расмийлар билан учрашади. Музокараларда мамлакатдаги сиёсий ислоҳотлар, гуманитар вазият ҳамда БМТнинг Сурияни тиклаш жараёнидаги иштироки муҳокама қилинади. Бу ҳақда Reuters маълум қилди.
Бу ташриф БМТ Бош котибининг Сурияга 2009 йилдан буён амалга ошираётган илк сафари ҳисобланади. Сурияда 2011 йилда фуқаролар уруши бошланганидан бери мамлакатга бирор амалдаги БМТ раҳбари бормаган эди. Башар Асад режими 2024 йил декабрида ҳокимиятдан ағдарилгач, халқаро ҳамжамият Дамашқ билан алоқаларни босқичма-босқич тиклай бошлади.
Сафар давомида Гутерриш Исроил ва Сурия ўртасидаги демилитаризация ҳудудида хизмат қилаётган БМТ тинчликпарвар кучлари билан ҳам учрашиши режалаштирилган. БМТ бу миссия орқали 1974 йилдан буён Голан тепаликларидаги сулҳ режимининг бажарилишини кузатиб келмоқда.
Кузатувчиларга кўра, ташриф БМТнинг Суриядаги янги сиёсий раҳбариятни қўллаб-қувватлаши ҳамда мамлакатни халқаро майдонга қайтариш йўлидаги муҳим дипломатик қадам бўлиши мумкин. Шу билан бирга, ташкилот сиёсий ўтиш жараёни барча сурияликларни қамраб олиши ва инсон ҳуқуқлари ҳамда хавфсизлик масалаларига устувор эътибор қаратилиши зарурлигини таъкидламоқда.
