Йил бошидан буён болаларга нисбатан зўравонликка оид 8 та жиноят иши қўзғатилди
2026 йилнинг дастлабки олти ойида Болалар омбудсманига 1147 та мурожаат келиб тушган.
Олий Мажлиснинг Бола ҳуқуқлари бўйича вакили (Болалар омбудсмани) 2026 йилнинг дастлабки олти ойидаги фаолияти юзасидан брифинг ўтказди.
Маълум қилинишича, ҳисобот даврида Болалар омбудсмани номига 1147 та мурожаат келиб тушган.
Мурожаатлар асосида ўтказилган ўрганишлар натижасида болаларга нисбатан зўравонлик ҳолатларига оид 8 та жиноят иши ва 15 та маъмурий иш қўзғатилган. Шунингдек, жиноят ишини қўзғатишни рад этиш ҳақидаги 6 та қарор асоссиз деб топилиб, прокуратура томонидан бекор қилинган ва қайта ўрганиш учун юборилган.
Ҳисобот даврида бола ўз ихтиёри билан чиқиб кета олмайдиган муассасаларга 56 маротаба мониторинг ташрифи амалга оширилиб, у ерда сақланаётган 1289 нафардан ортиқ бола билан якка ва жамоавий суҳбатлар ўтказилган.
Болалар ҳуқуқлари бузилиши ҳолатлари юзасидан жами 18 та таъсир чораси қўлланилган. Жумладан, 4 та огоҳлантириш, 7 та тақдимнома, 5 та хулоса ҳамда 2 та суд ҳужжати устидан протест келтириш тўғрисида илтимоснома киритилган.
Шунингдек, бола ҳуқуқларига оид қонунчиликни такомиллаштириш юзасидан 43 та норматив-ҳуқуқий ҳужжат лойиҳаси бўйича таклифлар берилган, болалар ҳуқуқларини тарғиб этишга оид 1048 та медиа материал эълон қилинган.
Бундан ташқари, Болалар омбудсмани UNICEF билан ҳамкорликда 9500 нафардан ортиқ бола иштирокида ижтимоий сўров ўтказган. Халқаро ва миллий ҳамкорлар билан олиб борилган ишлар натижасида эса 22 нафар бола хориждан Ўзбекистонга қайтарилган.
