“Мен кетганимдан сўнг барчангиз банкрот бўласиз” — Трамп
АҚШ президенти сиёсий фаолияти якунлангач, кўплаб Америка оммавий ахборот воситалари банкрот бўлишини, чунки у ҳақида ёзадиган бошқа шахс қолмаслигини айтди.
АҚШ президенти Доналд Трамп сиёсий фаолияти якунлангач, кўплаб Америка оммавий ахборот воситалари банкрот бўлишини айтди.
Оқ уй мухбирлари ассоциацияси қабул маросимида нутқ сўзлаган Трамп, оммавий ахборот воситаларининг фаолияти кўп жиҳатдан унинг шахсига боғлиқ эканини таъкидлаган.
“Мен кетганимда, барчангиз банкрот бўласиз. Сизнинг бизнес моделингиз ҳам йўқ бўлиб кетади. Чунки ёзадиган ҳеч ким қолмайди”, — деган АҚШ президенти.
Трампнинг фикрича, Америка оммавий ахборот воситалари асосан у ҳақида материаллар тайёрлайди ва сиёсий фаолияти тугаганидан кейин улар аудиториясини сақлаб қолишда қийинчиликларга дуч келади.
Шунингдек, у ОАВ вакиллари ўзи ҳақидаги хабарларни асосан салбий оҳангда ёритаётганини ҳам таъкидлаган.
Нутқи давомида Трамп ҳазил тариқасида президентликдаги эҳтимолий учинчи муддати янада муваффақиятли бўлиши мумкинлигини ҳам айтиб ўтган.
