Руминия ҳаво ҳудудига кирган яна бир дрон йўқ қилинди
Украина жанубидаги жанговар ҳаракатлар фонида мамлакат ҳаво ҳудудига кирган дрон ҳарбийлар томонидан йўқ қилинган.
Руминия президенти Никушор Даннинг маълум қилишича, дрон маҳаллий вақт билан соат 08:30 атрофида Дунай дельтаси ҳудудидаги Sfantu Georghe шаҳридан тахминан 10 километр ғарбда уриб туширилган. Операция Руминия ҳарбий-ҳаво кучлари томонидан амалга оширилган. Бу ҳақда Reuters хабар берди.
Руминия Мудофаа вазирлиги ҳодиса юзасидан тергов бошлаганини билдирган. Ҳарбийлар дроннинг қолдиқлари топилган ҳудуд ўраб олинганини ва мутахассислар унинг келиб чиқиши ҳамда парвоз йўналишини аниқлаш устида ишлаётганини маълум қилгам. Дастлабки маълумотларга кўра, қурбонлар ва вайронагарчилик қайд этилмаган.
Бир кун аввал ҳам Руминия F-16 қирувчи самолёти мамлакат ҳаво ҳудудини бузган дронни уриб туширганди. Прокуратура олиб борган дастлабки текширув натижаларига кўра, ўша дрон Россияга тегишли бўлиши мумкин. Бу Руминия Россия-Украина уруши бошланганидан буён ўз ҳаво ҳудудига кирган дронни илк бор уриб туширгани бўлган.
Сўнгги йилларда Россиянинг Украинадаги Дунай портларига уюштирган зарбалари вақтида бир неча бор дронлар ва уларнинг парчалари Руминия ҳудудига тушган. Шундан сўнг мамлакат шарқий чегараларида ҳаво мудофааси кучайтирилиб, бундай ҳолатларда ҳарбий авиация тезкор равишда ҳавога кўтариладиган тартиб жорий этилган.
