Шавкат Мирзиёев таваллуд куни муносабати билан йўлланган табриклар учун миннатдорлик билдирди
Президент Шавкат Мирзиёев таваллуд куни муносабати билан йўлланган табрикларни Янги Ўзбекистоннинг халқаро нуфузи ва халққа билдирилган ҳурмат ифодаси деб баҳолади.
Ўзбекистон Президенти Шавкат Мирзиёев таваллуд куни муносабати билан йўлланган табрик ва эзгу тилаклар учун миннатдорлик билдирди.
Давлат раҳбари ўз мурожаатида уни табриклаган давлат ва ҳукумат бошлиқлари, хорижий сиёсат ва жамоат арбоблари, ишбилармон доиралар вакиллари, халқаро ташкилотлар раҳбарлари, шунингдек, мамлакатдаги маҳаллалар ва меҳнат жамоалари, нуронийлар, ёшлар, хотин-қизлар, тадбиркорлар ҳамда барча ватандошларга самимий ташаккур изҳор этди.
Президентнинг таъкидлашича, унинг шаънига йўлланган табрик ва тилаклар, аввало, Ўзбекистон халқи ва давлатига билдирилган юксак ҳурмат ва эҳтиром, шунингдек, Янги Ўзбекистоннинг халқаро майдондаги обрў-эътибори ва нуфузи ортиб бораётганининг эътирофи ҳисобланади.
Шавкат Мирзиёев, шунингдек, бағрикенг ва олийжаноб Ўзбекистон халқига чексиз меҳр ва ҳурматини яна бир бор билдириб, мамлакатда эркин, фаровон ва обод ҳаёт барпо этишга қаратилган ислоҳотлар халқнинг ақл-заковати ҳамда фидокорона меҳнати билан ўз самарасини беришига ишонч билдирди.
