Тошкент аэропортида 11,8 кг гашиш мойи мусодара қилинди
Наркотик моддалар Ўзбекистон орқали қўшни давлатга транзит тарзида олиб ўтилиши режалаштирилган.
Давлат хавфсизлик хизмати ходимлари томонидан «Тошкент-Аэро» ихтисослаштирилган божхона комплекси билан ҳамкорликда ўтказилган тезкор-қидирув тадбирлари давомида хориждан олиб келинган йирик миқдордаги гиёҳвандлик воситаси мусодара қилинди.
ДХХ маълум қилишича, “Бангкок – Деҳли – Тошкент” авиайўналиши орқали пойтахтга учиб келган 2005 йилда туғилган Қирғизистон фуқароси «яшил» йўлак орқали ҳаракатланган. Унинг чемоданлари белгиланган тартибда текширилганда, шампунь идишларига яширилган 11,8 килограмм гашиш мойи борлиги аниқланган.
Тезкор тадбирнинг кейинги босқичида мазкур гиёҳвандлик воситаси Юнусобод туманидаги кўп қаватли уйлардан биридаги хонадонга қолдирилган. Уни олиб кетиш учун келган 2001 йилда туғилган Чирчиқ шаҳри фуқароси ҳам қўлга олинган.
Дастлабки терговга кўра, ушбу гиёҳвандлик воситалари Таиланддан Ўзбекистон орқали қўшни давлатлардан бирига транзит тарзида етказилиши режалаштирилган.
Мазкур ҳолат юзасидан гумонланувчиларга нисбатан Жиноят кодексининг 246-моддаси 2-қисми (контрабанда) билан жиноят иши қўзғатилиб, уларга нисбатан қамоқ эҳтиёт чораси қўлланилди. Ҳозирда тергов ҳаракатлари давом этмоқда.
