Тошкентда маст аёл йўлнинг қатнов қисмига ётиб олди

 

Ижтимоий тармоқларда йўлнинг қатнов қисмига ётиб олган аёл акс этган видео юзасидан расмий маълумот берилди.

 

Тошкент шаҳар ИИББ маълум қилишича, ҳодиса 2026 йил 25 июль куни соат тахминан 08:00 да Тошкент шаҳрининг Яшнобод тумани, Бешариқ кўчасида содир бўлган.

 

Дастлабки маълумотларга кўра, 1976 йилда туғилган фуқаро Е.А. маст ҳолатда йўлнинг қатнов қисмига ётиб олиб, транспорт воситаларининг эркин ҳаракатланишига халақит берган ҳамда жамоат жойида юриш-туриш қоидаларини қасддан бузган.

 

Фуқаро билан ўтказилган суҳбат давомида унинг спиртли ичимлик таъсирида экани аниқланган. Шундан сўнг ички ишлар ва тиббиёт ходимлари томонидан у 4-шаҳар клиник шифохонаси ҳудудидаги ҳушёрхонага олиб борилган.

 

Мазкур ҳолат юзасидан Яшнобод тумани Ички ишлар органлари томонидан терговга қадар текширув ишлари олиб борилмоқда. Текширув якунларига кўра, қонунчиликда белгиланган тартибда тегишли ҳуқуқий қарор қабул қилиниши маълум қилинди.