UNESCO Фаластин ва Ливандаги тарихий обидаларни Жаҳон мероси рўйхатига киритди
Яқин Шарқдаги можаро сабаб бу объектлар хавф остидаги мерослар рўйхатига ҳам қўшилди.
Қарор Жанубий Кореянинг Пусан шаҳрида ўтказилган UNESCO'нинг Жаҳон мероси қўмитаси йиғилишида қабул қилинди. Қўмита Себастия ва Моунт Амел қалъаларини фавқулодда тартибда кўриб чиқиб, уларни бир вақтнинг ўзида Жаҳон мероси рўйхати ҳамда Хавф остидаги Жаҳон мероси рўйхатига киритди. Бунга Яқин Шарқдаги давом этаётган қуролли можаролар сабаб қилиб кўрсатилган. Бу ҳақда APnews хабар берди.
Себастия Наблус шаҳри яқинида, Исроил босиб олган Ғарбий Соҳилда жойлашган бўлиб, тарихчилар уни қадимги Самария - Библияда тилга олинган Исроил подшоҳлигининг пойтахти сифатида эътироф этади. Ҳудудда темир даври, Рим, Византия ва ислом даврига оид археологик ёдгорликлар сақланиб қолган. Шунингдек, христиан ва ислом анъаналарига кўра, Яҳё пайғамбар шу ерда дафн этилган.
Ливандаги Моунт Амел ҳудудидан рўйхатга киритилган бешта қалъа эса салибчилар, Айюбийлар, Мамлуклар ва маҳаллий меъморчилик анъаналарини ўзида мужассам этгани билан тарихий аҳамиятга эга. Улар орасида Исроил қўшинлари жорий йил май ойида эгаллаган Беауфорт қалъаси ҳам бор.
Исроил Ташқи ишлар вазирлиги ушбу қарорни танқид қилиб, номзодлар сиёсий мақсадларда илгари сурилганини ва Себастиянинг яҳудий ҳамда христиан тарихини инкор этишга уриниш эканини билдирган. Шунингдек, Исроил Беауфорт қалъаси ҳудудидан «Ҳизбуллоҳ» ҳарбий мақсадларда фойдаланаётганини даъво қилган. Ливан вакиллари эса қалъалар 2000 йилдан буён фақат маданий ва туризм мақсадларида фойдаланиб келинаётганини таъкидлаган. UNESCO эса барча номзодлар бир хил мезонлар асосида баҳоланишини ва ташкилот сиёсий низолар бўйича тараф тутмаслигини маълум қилган.
