Япония икки нафар Ўзбекистон фуқаросини депортация қилди
Бири техник стажёр визаси, иккинчиси эса қисқа муддатли виза билан Японияга кириб, рухсат этилган муддат тугаганидан кейин ҳам мамлакатни тарк этмаган.
Япония Иммиграция хизмати мамлакат ҳудудида ноқонуний яшаб келган икки нафар Ўзбекистон фуқаросини депортация қилди. Бу ҳақда Япониянинг Ўзбекистондаги элчихонаси маълум қилди.
Қайд этилишича, депортация қилинган фуқаролардан бири Японияга техник стажёр (Technical Intern Training Program) визаси билан кирган бўлиб, рухсат этилган муддат тугаганидан кейин ҳам мамлакатда ноқонуний қолган. Иккинчи фуқаро эса қисқа муддатли виза билан кириб, визаси муддати тугаганидан сўнг ҳам Японияни тарк этмаган.
Ҳар иккала фуқаро кейинчалик Япония ҳуқуқни муҳофаза қилувчи ва иммиграция органлари томонидан ушланиб, Ўзбекистонга депортация қилинган.
Элчихона ноқонуний яшаш ёки ноқонуний меҳнат фаолияти аниқланган тақдирда қоидабузарлар ҳибсга олиниши, иммиграция марказига жойлаштирилиши ҳамда депортация қилиниши мумкинлигини эслатди. Шунингдек, бундай шахслар ҳақидаги маълумотлар Ўзбекистоннинг тегишли идораларига ҳам юборилиши қайд этилди.
