Ўзбекистонда туғилиш камайиб, ўлим ҳолатлари кўпайди
Олти ойда мамлакатдада 373 мингдан ортиқ чақалоқ туғилди.
2026 йилнинг январ–июнь ойларида Ўзбекистонда 373 минг 400 нафар бола туғилди. Бу кўрсаткич 2025 йилнинг мос даврига нисбатан 32 минг 100 нафарга кам.
Статистика қўмитаси маълумотларига кўра, туғилган чақалоқларнинг 192 минг 900 нафари ўғил, 180 минг 500 нафари қиз бўлган. Шунингдек, 182 минг 900 нафар бола шаҳарларда, 190 минг 500 нафари эса қишлоқ ҳудудларида дунёга келган.
Ҳисоботда қайд этилишича, мамлакатда туғилиш даражаси пасайиш тенденциясини давом эттирмоқда.
Шу билан бирга, жорий йилнинг дастлабки олти ойида 86 минг 900 та ўлим ҳолати қайд этилган. Шундан 48 минг 300 нафари эркаклар, 38 минг 600 нафари аёллар ҳиссасига тўғри келади.
2025 йилнинг январ–июнь ойларига нисбатан ўлим ҳолатлари сони 2 минг 800 тага ошган.
