Хитойда “Хунся” тайфун сабаб 700 мингдан ортиқ аҳоли эвакуация қилинди
Гуандун провинциясида кучли шамол ва жала ёғиши сабаб фавқулодда чоралар кучайтирилди.
Хитойнинг Гуандун провинцияси ҳукумати "Хунся" тайфуни сабаб 710 мингдан ортиқ аҳолини эвакуация қилди. Бу ҳақда Газета.ру хабар берди.
Маълум қилинишича, энг кўп эвакуация Хуичжоу ва Шанвей шаҳарларида амалга оширилган. Хуичжоудан 205 минг, Шанвейдан эса 192 минг киши хавфсиз ҳудудларга кўчирилган.
26 июль куни Гуандун провинциясига етиб келган тайфун вақтида шамол тезлиги сониясига 45 метргача етган. Ҳозирда циклон шимол томонга ҳаракатланиб, аста-секин кучсизланмоқда. Гуандун, Сзянси ва Хунан провинцияларида кучли жала ёғиши юзасидан огоҳлантириш эълон қилинган.
Қайд этилишича, 19 та шаҳар ва 135 та туманда бўрон ҳамда сув тошқинларига қарши фавқулодда чоралар режаси ишга туширилган. Бундан бир кун аввал эса 340 минг киши эвакуация қилингани маълум қилинган эди.
Шунингдек, Шантоу, Шенчжен, Гуанчжоу ва Дунгуан шаҳарларини ўз ичига олган 12 та шаҳарда "беш тўхтатиш" режими жорий этилган. Унинг доирасида корхоналар фаолияти вақтинча тўхтатилган, мактаблар ва бозорлар ёпилган, жамоат транспорти ҳаракати чекланган ҳамда қурилиш ишлари тўхтатилган.
