“Энергетикадаги муаммо маблағда эмас, тизимни бошқаришда” —Шавкат Мирзиёев
Давлат раҳбари июнь–июль ойларида 4 мингга яқин авария содир бўлгани оқибатида аҳоли ва тадбиркорлар 8–10 соатгача электрсиз қолганини қайд этди.
Президент Шавкат Мирзиёев ёқилғи-энергетика тармоғининг устувор вазифаларига бағишланган видеоселектор йиғилишида сўнгги ўн йилда энергетика соҳасида кенг кўламли ислоҳотлар амалга оширилгани, хусусий сектор ва хорижий инвесторлар учун қулай шароитлар яратилгани ҳамда йирик лойиҳалар изчил қўллаб-қувватланганини таъкидлади.
Қайд этилишича, ушбу даврда соҳага 23 миллиард доллар хорижий инвестиция жалб қилиниб, ҳудудларда 9,5 гигаватт қувватга эга электр станциялари ишга туширилган. Шунингдек, электр ва газ тармоқларини модернизация қилиш учун 30 триллион сўм йўналтирилган.
Шу билан бирга, Президент энергетика тизимидаги асосий муаммо молиялаштиришда эмас, балки бошқарув ва масъулиятда эканини қайд этди.
“Очиқ айтиш керак. Энергетикада муаммо маблағда эмас, чунки қанча керак бўлса, топиб беряпмиз. Муаммо тизимнинг бошқарувида!”, — деди давлат раҳбари.
Йиғилишда Энергетика вазирлиги ва унинг қуйи бўғинларидаги ижро интизоми ҳамда назоратнинг етарли эмаслиги танқид қилинди. Таъкидланишича, айрим ҳудудларда электр тармоқларидаги юклама олдиндан тўғри баҳоланмагани сабабли авариялар сони ортган.
Маълум қилинишича, июнь–июль ойларининг ўзида қарийб 4 мингта авария содир бўлган. Натижада аҳоли ва тадбиркорлар айрим ҳудудларда 8–10 соатгача электр таъминотисиз қолган.
Президент ҳар бир узилишнинг иқтисодиёт ва тадбиркорларга етказаётган зарари чуқур таҳлил қилинмаётганини танқид қилиб, энергетика тизимидаги ҳар бир раҳбар фаолияти энг аввало фуқаролар ва бизнес субъектлари ҳаётида ижобий натижа бериши лозимлигини таъкидлади.
