Эрон Киевга зарба бериши мумкин — ОАВ
Тахминлар Эрон ТИВ раҳбарининг Каспий денгизидаги Эрон кемасига қилинган ҳужум жавобсиз қолмаслигини билдирганидан сўнг пайдо бўлди.
Al Jazeera телеканали Эроннинг Украина пойтахти Киевга дронлар ёки ракеталар ёрдамида зарба бериши эҳтимоли муҳокама қилинаётганини маълум қилди.
Телеканалга кўра, бундай зарба техник жиҳатдан мумкин. Сабаби, Теҳрон ва Киев ўртасидаги масофа 2 минг километрдан кам бўлиб, бу Эроннинг айрим дрон ва ракета тизимлари имкониятлари доирасига киради.
Мазкур тахминлар Эрон ташқи ишлар вазири Аббос Ароқчи Каспий денгизида Эрон савдо кемасига уюштирилган ҳужумни қоралаб, бу ҳолат жавобсиз қолмаслигини билдирганидан сўнг пайдо бўлган.
Аввалроқ Эрон Ташқи ишлар вазирлиги Украина Каспий денгизида Эроннинг савдо кемасига ҳужум уюштиргани оқибатида экипажнинг бир аъзоси ҳалок бўлгани, яна икки киши жароҳат олганини маълум қилган эди.
Украина Президенти Владимир Зеленский эса ўзининг Телеграм саҳифасида Украина Қуролли кучлари Каспий денгизида Эрондан Россияга ҳарбий юк ташишда фойдаланилган кемаларга зарба берганини билдирган.
Ҳозирча Эрон томонидан Киевга зарба берилиши юзасидан расмий қарор ёки амалий ҳаракатлар ҳақида маълумот эълон қилинмаган.
